Inhalt als PDF-Datei herunterladen 
01.12.2015  Antrag

Antrag Land: Biraat Platt mutt wietergahn

Andrag vun de SPD-Frakschoon un Bündnis 90/Die GRÜNEN


De Regionalspraak Plattdüütsch, de hier in’n Noorden tohuus is, mutt vun Generatschoon to Generatschoon wiedergeven warrn. Kloor is, de Minschen, de vundaag Platt snackt, schafft dat nich alleen, de Spraak in de Tokunft to hölpen.

In den Artikel 7 Afsatz 4 vun de Europääsche Charta vun de Regionaal- oder Minnerheitenspraken steiht binnen, dat Gremien insett warrn schüllt, de de Behörden bi allens hölpen köönt, wat mit de lütten Spraken to doon hett. Över de Tiet weg mutt dat mööglich ween, över dat to snacken, wat mit Nedderdüütsch tohoop hangt, un Ideen intobringen, woans de Sprakencharta ümsett warrn kann.

Plattdüütsch hett in Bremen un umto över Johrhunnerten en grote Rull speelt. Dat dat ok in tokamen Tieden noch so is, dorför hett de Bremsche Börgerschaft (Landdag) in de verleden 18. Regerungstiet en Biraat Plattdüütsch insett, so as de Europääsche Sprakencharta dat vörgifft. Nu mutt dat wietergahn mit de Arbeit vun den Biraat. Inricht worrn is he bi den Präsident vun de Bremsche Börgerschaft. So stellt Bremen rut: Dat is heel un deel wichtig, dat de Plichten ut de Europääsche Charta vun de Regionaal- oder Minnerheitenspraken ümsett warrt – un dat gellt för all Behörden un Parteien.

De Börgerschaft (Landdag) schall besluten:

1.    Dat geiht wieter mit den Biraat Plattdüütsch, de in de 18. Regerungstiet insett worrn is. De Biraat blifft anbunnen bi den Präsident vun de Bremsche Börgerschaft. In den Biraat schüllt sitten:

a)    Lüüd vun de Frakschonen ut de Börgerschaft (Landdag),
b)    een vun dat Institut för nedderdüütsche Spraak,
c)    een vun de nedderdüütschen Dackorganisatschonen in Bremen un Bremerhaven,
d)    Lüüd, de mit Nedderdüütsch in School, Wetenschaft, Medien, Theater, Kark to doon hebbt,
e)    Lüüd ut de Ressorts, de mit de Sprakencharta to doon hebbt.
 
2.    De Biraat Platt schall desülvigen Opgaven hebben, de he in de 18. Regerungstiet harr. Bavento schall he öffentlich över dat snacken, wat dat Land Bremen in den Lännerbericht to de Sprakencharta schrifft.



Sükrü Senkal, Elombo Bolayela, Björn Tschöpe un de Frakschon vun de SPD



Dr. Kirsten Kappert-Gonther, Dr. Maike Schaefer un de Frakschon Bündnis 90/DIE GRÜNEN